Is tres urreis

Iant incumentzau in dusu. Apoi de unus cant’ annus ‘nd’ iant cicau un’ aturu. Is primus dusu teniant sessant’ annus fatus giai de diora candu si fuant postus a fai su presèpiu po contu de sa pro loco. Unu fut abogau e s’atru pensionau e teniat cosa de terras e de propriedadi chi si curàt po contu sù. Sa pro loco poniada is personagius de su presèpiu, su pagu dinari chi podiat abbisongiari e calancuna atretzaduredha. Dhis iant impromìtiu fintzas e agiudu po is treballus prus grais ma dopu unu paghedhu dhus iant lassaus a s’amori de Deus. Su progetista fudi s’ abogau e donni’ annu, de presèpiu, ‘ndi pentzada unu drivessu, aici cumenti cambiada de un’ annu a s’ atru su bixinau innui dhu cuncordanta.

S’annu chi dh’iant fatu a su costau de sa banca, s’ inci fut aciuntu sia de tresi. Si finas a tandu dhisi naranta “il bue e l’asinello”, cun totu s’arrispettu chi si meritant issus e is duas bestiedhas chi in sa gruta de Betlemi iant funtzionau de “riscaldamentu”, de sa borta dhus iant ari batiaus “is tres urreis”. Custu fudi a pentzamentu insoru, ita ‘ndi pentzàt sa genti, bai e cicandedhi. De s’arrestu, pagu cosa ‘ndi dhis importada, si dh’iant assuntau cumenti de impenniu personali e donnia annu cumenti icrutzada su mesi de idas fiant prontus a incumentzari. Su primu a donai su scidu fut s’abogau e teniada bell’ e prontu su disenniu, ca a disenniari fut bonu meda e is atrus dusu dh’ aprovanta inderetura.

S’annu infatu chi funturu crèscius a tresi, iant pentzau du dhu fari in cresia manna, su presèpiu, e ‘nd’iant chistionau cun su frongiullu, arribbau a nou de pagu tempus. Su predi beciu teniat prus de otanta annus, fut in bidha de cinquanta annus fatus e dhi minexiat de si ponniri a riposu. S’ arretori dhis iat nau ca ehi’ e dhis iat donau libertadi de fari e afanteriari. Sa primu borta dh’iant cuncordau in-d una capelledha a manu de manca intrendi de su portali mannu. De-i cussa capella s’ indi fut perdiu s’arregodu puru, ca dh’iant murada bai e cica-e candu. ‘Ndi dhi’iant torrada a bogar’ a campu de unus cant’annus avreguendu ca dhui fudi, de candu iat essiri, a su costau de su campanili de s’ arrellogiu.

Sa cosa pariat andendu beni e iant detzìdiu de dh’ aprontari s’annu infatu in sa primu capella a manu ereta intrendu, ca fut prus manna. Po essiri manna fut manna bastanti ma però dhui aiat cosa puru de ‘ndi bogari. Tantis po incumentzari unu confessionali de linna mannu mannu e grai che tronu; frotzis po mori de totus is pecaus chi si dhui fuant istentaus. Pagu mali ca sa genti in custus urtimus corant’ annus non costumada a si dhui inginugari prusu po ‘nci stuari totus is pecaus aintru, de chi nò no’iat ari fatu a dhu trantziri. Apoi dhui aiat, una a una parti e una a s’atra, duas colonnas de mramuri chi tocada a lassari anca fiant a fundu de muru asuta de una ventana tunda serrada a umbirdus de unnui ‘nd’ intrada sa luxi de sa dia.

 

Sa ventana fut in artu meda e tocada a fari acrobatzias po dhu’ arribbari a dha serrari a cartoni po non ‘ndi far’intrari sa luxi. In pitzus de una colonna dhui aiada una Madonna cun-d una corona manna manna chi arresciat in donnia logu candu meganta de dha trantziri. Imprusu fudi mesu filia in-d unus cantu logus e timiant sempri a s’isciasciari e fiant sempri s’unu cun s’atru: “Dona a cura a Mariedha!” “Dona a cura a Mariedha!”.

 

In pitzus de s’atra dhui fut s’imperartu de Isidoru cun su ‘iù, s’aradru, e s’Angiulu chi treballàt po su Santu. Donnia borta ‘nci depiant ponniri totu in pitzus de una portantina po ‘nci tragari su Santu de is liponis e totu sa cumpangia a sa capelledha chi fiaus arremonendu prima. Un annu in su trapagiocu iant istumbau a un’atza de muru e a s’Angiuledhu dh’ iant spitzicorrau un’ala. Pagu mali ca unu de is tres amigus fut de manu bona e s’arrangiada in custu tipu de treballus; de linna iat fintzas-e fatu sa statua de Sant’Antoni in sa cresiedha de Fadali. De aici dh’iant postu arrimèdiu e non s’indi fut acatau mancu su ‘atu.

 

A is atrus dusu dhis iat contau ca, cumenti fudi aconcendudidhu, dhi fut partu de intendiri a s’Angiuledhu murrungia murrungia: “No’ abbastat ca mi deppu fari su treballu de chini s’abarrat arrosendi, immoi ‘nci boliant puru custus tresi malandaus a mi ferriri a isdaladura. Lassa, candu m’adobiu a Baldassarre a Melchiorre e a Gasparre… ca mi dhus fatzu codoniari a “is tres urreis!”

Elio